Welcome to the ZOFORUM Site

USA ah UZO Pawi (ZO Khawmpi) Nasietah Kibawl !

2009-06-01T01:11:00.000-07:00

By: Pa.Pau Lian Khup

Kum 2009 May 23-24 UZO Pawi pi Fort Wayne,IN ah nuom tah in ei guol zawpih Topa tung ah lung dam ih koh masa vuh hi.Amasa in kangthum nuom vuh ahi leh ko inn teh te UZO pawi tung tawn in zin te mai le mipi mai ah kacin lah na zo sieh vuh ang pei mimal tan kim in nei mawmai sah ding vuh kang thum masa vuh hi.

Tu kum UZO Pawi ang pei vehpi 170 val aa ni nga ni ang tung te ahin sani ni ang tung te ahin, gim le cimtah om lo in zin kahawm kim vuh hi.Sani ni bawlung kisui na-ah mun tuom ciet pan ang kimawl team guh(6)pha in akhat na Atlanta,Georgia in la-in anih na Fort Wayne(B)in ngah hi.ki siem thei ciet mama in munop huai ma ma ciet hi.Ni pi ni zan lai nai 8:45 pan in lenkhop hun kinei kia -a hun veh pi zanhun zosie Pa.Pau Lian Khup in ei makai Chairman eisep pieh hi.

Zan hun ah Zo lia kitel na kinei masa in Nu.Niang Ngaih Lian in hing makai masa hi.Lam pei dan leh omdan khawl dan,nisilh puon silh dan teng nu nga te ei makai pieh Nu.Niang Suon Vung Nu.Niang Khen Cing le mat ei pie pieh Dr.Pau En,Pa.Min Lian,Tg.John Khai Pa.Kham Thawn Thang le Nu.Bawi Nu te tung ah zong lung dam kang koh hi.Nu nga te mat kipieh dan pen amel beh ki en hilo in khenli bangin ki en in mat kipieh hi.(1)Amel(2) Sil le ten lam pei dan(3)Zo ham(4)thu dot na dawng thei/lo in ki khen hi. State tuom ciet pan Nu nga kidem sawm(10)pha in mel hoi ciet in ngai bang thei ciet mama hi.Nu nga sawm (10)lah pan in mi thum(3) in guol zaw na letsong hing ngah in anei a teng ahi hi.

(1)Lia.Cing Lam Nuom(Lam Nuom) Florida pan: abeh min Dopmul

Apa.Pau Khan Thang
nu.Ciin Nian No
Akhuo:Khampat ahi hi.

(2)Lia.Man Sien Vung(Vungno) Fort Wayne,IN pan: abeh min Milun
Apa. Thang Kho Hau
Anu.Ngai Lam Niang
Akhuo:Lungtah ahi hi.

(3)Lia.Don Hau Nuom(Nuomno) Fort Wayne,IN pan: abeh min Tungnung
Apa.Khup Lam Pau
Anu.Nieng Khan Cing
Akhuo:Phaitu ahi hi.

Akhat na nu pen UZO President tha pan letsong eipie pieh in anih na nu Rev.Thawng Lian Khup in letsong eipie pieh in athum na nu Rev.Abraham Cinen Thang te in letsong eipie pieh vuh hi.Bawlung sui te pen akhat na le anih na te letsong pen Fort Wayne pan Pa.Cin Suon Pau in eipie pieh hi.

Pawi sung tawntung Lasa siem Suon Lian le Mung Bawi zong tha ngah ma ma in lasa zieh zieh gel aa tha kingah ciet munop huai kisa ciet mama hi.La eisah pieh Suon Lian le Mung Bawi tung ah zong mipi tang le innteh te tangin lungdam kang koh hi.Music zong eitum pieh te siem thei mama in mipi in thangah thei mama hi.Music ei makai Pa.Pau Khan En Pa.Cin Tho Mang Pa.Muonpi le Tg,Hang Muon te tung ah zong lung dam kang koh vuh hi.Tu kum UZO Pawi pi hun man na tawpna thu Rev.Thawng Lian Khup in ei neipieh zo ciengin UZO Pawi pi kimaan sah in kaki khen ciet ta vuh hi.Mai kum ciengin Atlanta,Georgia- ah tung ding aa tutung sangin napi tah in anuom zaw dingin ki lam et ciet aa ki tha lawp ciet ban ah mi tam zaw lai ding in ki um maw ciet hi.Kum 2009 Fort Wayne,IN UZO Pawi aa akhat na pan athum na ngah te maan zong hinghah ing lungdam.

Topa'n Zo tate hing lamsang ciet taheh
Pa.Pau Lian Khup

Lelen IRAQ pei kiata!

2009-04-12T19:29:00.000-07:00

Pa.Pau Lian Khup

Tam atung aa thulu tawh kizui in leitung gam buppi leh Zo tate dingin athu pi ma ma hisih nan le khat le khat ki lung dam pi ciet ding thu ki nget pie ciet ding ka dei na tawh kang suo sah ahi hi.

Rev.Abraham Cinen Thang le Nu.Dim No te tapa nih na ahi Tg.Hau Len Thang (Lelen) pen July 22,2003 kum in USA galkap ana lut aa Colorado State ah ba khat aom zaw ciengin Iraq gam ah gal han namun pen pen ah ki puah in kum ni(2)ava om ta hi.Kum nih zaw ciengin anu apa te unau sanggam te kung hing pei kia hi.Sang kah ding College kahding cia ngim na,nei hinapi,USA kumpi ten gal kuon kia dingin hankia vuh ahizie in Iraq gam vapei kia ta in,Iraq gam pan 3/26/09 ni-in apien na-anu apa unau sang gam le pawlpi akoi mapoh teng tawh kimu dingin Fort Wayne,IN hing tung aa 4/11/09 ni Iraq a gal kap namun ah pei kia ta hi.

Tulai tah in Specialist mun ah aom aa Iraq akuan kia hun lai in kum khat val beh galkap kasep zo ciengin khawl tavang' aci hina pi, tutung ang pei ciengin kum guh kaom lai,ka sem lai ding ci kia hi.Ama tup na ngim na-ahi leh May hla ciengin Iraq pan USA hing tung kia ding aa USA galkap kum guh(6)sep sawm lai-in kum guh sung in Bu suoding in alung tup na leh angim na khat ahi hi.Tua zie in USA galkap Zo tate sung pan galkap masa pen ahi bang
ma in USA gam Zo tate lah pan US galkap Bo suo masa pen ang hi thei na dingin zong thu nget na tawh panpi ciet in,thau vui thautang phudet in aom na pan cidam in galkap nasep anuosie'h dong Topa'n ang kep na ding thu nget na tawh panpi ciet vai cin kang zasah vuh hi.

Ama maan kanghah te pen Iraq kumpi pa SADDAM HUSSEIN ki tha zo aa maan te ahia,Saddam Hussein kumpi to na tunga-a to na maan te ahih hi.Gen khiel le dei lo thu aom kha le nei na mai sah ding vun kangthum hi.

A tho kia lo hi maw leh

2009-04-12T19:27:00.000-07:00

A tho kia lo hi maw leh cih thu tawh kisai-in ka tha ngana towm hing at ing.

Biehna nam tampi om a, pasien kinei ciet in ang si zaw uh cieng a tho kia pasien pen nang leh kei i bieh PASIEN khat beh ma ahi zie-in tuo ka ki-ang tan sahna thu ma a gen nuam hi zaw ing.

Lai Siengtho: Rom 8:10-11, Tuachia Krist khu nouma a ahin leh, khelna jieh a na tahsa uh shi ding hinanleh Pasien masanga siemtang na hi tah jiehun, Hagau khu noua dingin hinna ahi hi. Pasien Hagau, shna pata Jesu kaithoupa nouma a aten leh Krist shina apat kaithoupa Hagau nouma a aten jiehin na tahsa shithei pen khu hinna pe va.

Tua pen, Jesu i Mangpa uh kaithou kiapa gingtate a ding zong ahi hi. (Rom 4:24)

A thaw kia zie-a i ham phatnate:

Eden huan sung pan a kihawlkhie minam suante i hi a, i mawna zie-ua a si dingte (Rom 6:23) zong i hi zie-in, man pie lo Pasien letsong ahi nuntat tawntungna i nga hi.

Pasien in tuo Khris zie-in eihow mawna ciaemte lo-in ama towh ei kilem sa hi. (2 Cor 5:18-19)

Mawna sila khut sung pan i suatat zaw ciengin dihna sila ei suah sah hi. (Rom 6:18
Sila cina pan lawmte cina za kinga lai lai ( John 15:14)
I up leh thukhenna tawh kipel ding. (John 3::18)
Pasien' tate kisua. (John 1:12-13)

Tuo Jesu i up i san sih a, i nei nai mowngmowng khah sih leh pen, tam a tunga thute ei ading hi lo ding ahi ta zie-in da huai mama ding hi.

A tho kia lo hi maw leh tu ni i nuntatna bang cieng tung ding ci a tha in kingaihtua pha kia dingin i thei sa thu vive ma hi ta leh tuo a tho kia Jesu ma pom in i nei nadingin i bieh i Pasien min towh kong za sah kia hi.

A THU KA THEI DING HI SIH, A KHUT KA TUH DEN DING HI ZAW VE AW

Ka gen khiElna a om leh nei mai sah na dingun i Topa Khris min tawh hing thum ing. A hun i ngah towh kizui-in i tha nganate kiza sah zel va vui e guai.

Khris sungah,
Meng Thang
New Zealand

Mangham Sinna Kihong

2009-03-10T08:46:00.001-07:00

"Mang ham le manglai thei lo pen hamsa mama, ang pei ding te in ang sin teitei ta un" cia gamthum na atung sa imi ten gamni na om imi te adeih sah natawh ataaw uh thutung tawn aa agen thu uh, tawmno khat bek imi te ikhang zo tuom eimah ci deihsah natawh a bei sa hla aa patin Wangsa Permai vengah Manglai le mangham sinna sang khat ihong zo kia uhi.

Sangah Sie. Deniel Kham in sum ngenlo in mangham le manglai ei hil pieh aa, mi sawmni val bang ka hi. Adeuhdeuh in gamthum na peiding nupi pasal te in inn sung vanzah le gyi ( market ) pei thei na ding cieng beh theisah zolei ci deihsah natawh sum lalo in nikhat nai 2 sung, Monday to friday cieng sang kihong hi.

"Imi te ideih sah natawh hanciem aa ihil uh hi'n deihna nei tawm mama ve aw, Yangon lah ah naikhat bangza? citawh ihil hiven, aman neilam kithei lo mawkin" ci'n lai eihil pieh siepa in gen hi.

Wangsa Permai vengah imi te pilna lam sin theina naupangsang, computer sang le manglai le mangham sinna sang ci'n sangthumm ineih ta uhi.

Mailam ah numei khutsiem sinna sang te zong hon zo nading in thunget natawh hanciem na kineih hi.

Rev.Dr. GINKHANMUNG in BISHOP Nga !

2009-03-10T08:39:00.000-07:00

(Rev.Dr. GINKHANMUNG, Bishop of Manipur Evangelical Lutheran Church (MELC), KIPAHPINA LEH ANNKUONG UMKHAWMNA VAIGUON THUTUT) Apeisa nimit 24th kiginni in, Delhi a om Zou tate tampite kihal in, ZOD Hqtrs, G.K-I, New Delhi mun ah, Zo tate lah a, Bishop kai masapen Rt.Rev. Dr. Ginkhanmung, B.A, B.Th, D.D, Bishop of MELC (Manipur) kipahpina leh annkuong îmkhawmna a neipieh uhhi. Programme nai 7.45 P.M in a kipan a, Tv. Kammuanmung Gen.Secretary, ZOD in conductor hina la in, hun patna la ‘Mangpa Loupipen’ chi mipite ding kawm in, ngaitahin a kisa hi. Tuazouin, Nu Chinglienchiin, Treasurer, ZOD in hunpat thumna Pasien kungah kilan in a’ng neipieh hi.

Self-introduction neina khatkhat in a kibawl chiet hi. Tuazaw in, Ex-Chairman, ZOD, Pa SK Mung, Pastor, Congregation of Yahweh, New Delhi in, Thupi genkhietna a’ng neipieh hi. Khovel hinkhuo I zahna nuom u’ah, mitampite’n siemtu theilou a hunzahnate lah a, eite Pa nasem ding a tel a I op thei thupi ka sa hi. Inntepa’n ZOD te’n Bishop kipahpina leh annkuong umkhawmna nei ding ahi chia ahing hil laiin, khovel a belamchingte tahtah lah ah, zong a lien pawl Bishop ahi chi thu ka zah in, ka na kipahpi a, ka thei khomkhom ka na kisa a, tam bang hina lunglutna thanopna tunga Pa deisahna tang a belamte chingpu tahtah a guot a omte lah a, a lien pawl hina dinga I deisah ziehin thupi ka sa hi. Lungdam huoi leh kipahhuoi ka sa hi.

American gam a a biehnapite a'ng zin in, a pei kuon un, Mung Pastor ka'ng ordain nuom uh, ahi, chiin a'ng gen u'a, ih va chi ding lah, Pasien telna nuolpa kisuoh ding ahi, ing va chi ding lah, Pastor hina lien seng ka sa hi. Khovel ah, Pasien thu theilouin, a nautang danin, I ut ut danin, ki om na lai leh, chi khu ka lungsim ah a'ng kilang a, keima leh keima ka ki-et chiengin fitlou ka kisa a, ahivangin, noute’n pha na sah uh leh, chiin, ih ka na chi sih hi. Tuniin na mai u'ah Pastor danin ka'ng dingthei hi. Sawltah Paul khu chinglou sasa in, kei bangdia nei hlat e? a chi a, tuachiin kei zong ching lou sasa in, ei na hlan hi. Kei ngaidan in, Pastor kichi Bishop kichi khu Shepherd ‘belamching’ ahi. Yahsua’n kei belamching dihtah ka hi, a chi hi. Ka belamchinte si tangin a a si ngam ahi, Yahsua’n a chi hi. Tuachiin khovel ah, belamching/Pastor dih leh dihlou om ahi, chiin a kithei hi. Pastorte, Bishopte hina nei sesete a sienthou ding, chi hilouin, a belamte zong a sienthou ngai ahi. Tuachiin, Lasiengtho bu sungah zong ka sim leh ka simdoh khat a om hi. Khovel ah mihingte tahsa lam neh leh dawn zonna ah, kham muna ah a point a kipie a, IAS, ding IPS, IRS ding chite a point a kipie a, kila ahi. Khovel ah tahsa lam ah zong kumpi a point a pieh, tuniin inntehpa Philip Mangkang zong Saletax ah DC a touthei dinga kimawh lah hilou hi, kumpiin a fit ei chia ki-en, in tuachia na kila ahi. Ei leh ei ut thu a Pastor hina, Bishop hina hih kimu kipie hi zenzen lou hi.

Ama’n, a genna ah, Lasiengtho sunga Bishop, Pastor, Deaconte om ahi chithute ang hilchien hi. Tuabang mite, bangchi banga khosa(hinkhuomang) ding uh ahiei? chite zong Bible toh kituohin, ang hilchien hi. Pasien in, Zote a dopsang dante, thu nempi a gen hi. Mawl nanlei, zawng nanlei zong Pasien in, ei Zote a’ng lungsiet tuom ahi, thu a mudante a’ng gen hi. Pasien in, Zotate sese a’ng tawisang dan thupi leh loupi a sahdan thute a’ng genkia hi. Ama’n, ama mimal in a kipahpithute a gen a, ei sese bangzieha, Pasien in ei na tel ahiei? chi’n hanthawnna thu tampitah a genzaw in, Pasien kungah thumna a’ng neisah hi.

Ama’n tuami hun a zah zaw in, 2009-2011 sunga ZOD vaipote Oath-taking Ceremony, pen Pastor G.K Samte khuttung pan in ZOD Cabinette’n Pasien leh mipite maiah kichiemna a nei uhhi. Tuazaw in, khatkhat in, Oath of allegiance suoikaina zong a nei pai ngal uhhi. Tua toh kizuiin, Pastor SK Mung, Pastor GK Samte leh Bishoppu in ZOD Cabinette tungah khutngapna a nei u’a, Pasien kungah Thumpiehna(Guolzawlna) a ngetsah uhhi. Oath-taking zouin, mipi thugenna(speech if any), a banban in, a om a, mipite’n Bishoppu a kipahpidante uh, a gen tui mama uhhi. Nu Nemnu, Nu Chinglien, Nu Chingboi, Nu Nuomzavung, Nu Lunkhannuom(Pastornu), Nh. Cicily, Nh.Dimngai, Pa Pumjagin, Pa Hahau, Pa Nangpi, Pa. Kamlun, Tv. Muonlal,Tv. Paulienthang, Tv. Khamsienpau, Tv. Lucas Khaipu, Tv.Letminthang, Tv.Khuplianlam, Tv.Douminlien,Tv. leh adangdangte’n kipahpina thu a gen uhhi.

Tuachiin, Richard Lienpi Suantak Vice-President, ZOD in ZOD tha-hlengin, Bishoppu a kipahpidan thute a’ng gen hi. Ama’n a genna ah, ei Zote pen Pasien in a’ng lungsiet mama u’a, siemna pilna leh hauna toh kiching ma sih lei zong, ahing hepina thupi mama chiin a gen hi. India gam a dingin Dr. Ginkhanmung pen Bishop masapen ahina a kipahpina thu a phuong a, Kawlgam sunga Zo te lah a, Bishop suoh masapen, i Catholic Bishop masapen Rt.Rev. Felix Lienkhenthang ahi, thute mipite maiah a’ng talang hi. Pasien in ahing hepina leh lungsietna thute simsenglou in , a kimutheita hi, chiin mipite a hanthawn hi. Pu Bishop in mipite adingin sep leh bawl tampi gasuongsah dingin, thumpieh chiet vai chiin, a kipahpna lienpi toh a thugen a tawpsah hi. Mipi a'ng peikhawmteng tungah zong ZOD min in lungdamkouna a nei kia sawnsawn hi.

Rt.Rev. Dr. Ginkhamnung, in thugenna, a nei hi. Ama’n Lasiengtho simna “You have not chosen me, but I chose you, so that you may bear much fruit, whatever you ask of my father in my name you will receive ‘Ke’n noute gasuong dinga ka’ng tel ahia, noute nahing tel ahi sih hi”. Pasien hing deisahna tam bang ahi.

Tutung Delhi a NGOte toh kikum dinga, a’ng zin na thute tomkim a’ng gen hi. A neulaia, a laisim dante, middle level grade ahidante, Pasien thu a’ng muzou a, M.Div bawl a kipat in, Pasien in, a Grade First class ngen a’ng musahthei ahi chiin, a testimony a hil hi. Bishoppu in a genna, Pasien thu a mu masanga, politigs leh tahsa lam a kalsuonna; etsahna dingin; ZNC ah zong CVC tan a na kaisang thute a gen chiengin Pasien in deisahna a tansahte genchim si’ng achi hi, tuiin Pasien nasepna lam ah, Pasien in Bishop tan kaithei a, a siem na tungah Pasien tunga a lungdam thu a phuongdoh hi. Pawlpi tungtang thute a genna ah, ‘Nidangin, phamsa Rev. Ginjapao, phamsa Rev. Khupdoukham leh pastor hunkhopte’n Zomi Christian Church 1972 kum a, a na phu pen un, ka na kipuo u’a, himaleh, bul leh zung neilou ahi ziehin, sum leh pai lam, ka tahsa lam khanletna lam ah, ka masawn tahtah zou sih u’a, bangchileh, bulpi det mission khat a kineithei diei?, chiin, ZCC te’n ka na thum zing u’a, Pasien in ka thumna uh, kum 2002 in a’ng sang a, gintahloupiin, tu-a Lutheran Church toh ka’ng kizopthei u’a, tuachiin Manipur Evangelical Lutheran Church(MELC) in ZCC pen ka’ng hlengkheta uhhi. MELC dan a ka ki vaihawmna uh pen, kum 6guh val a chingta a, tukum toh kum 7 sagi kipan ahita hi. Pasien in hing mapui henlen, Zogam sungah mipite khantouna tampi kisem leh chi khu koute thumna a hi zing hi. 2006 kum in Pasien nasepna lamdang mama khat ka thei ahileh, kei pen gintatloupi Executive Secretary, MELC in ei na kitelching hi. Tuachiin, tuami kum ma-in Bishop Elect ka nga pai a, tua hina ka na ngazaw kum 2 ni zouin, tukum January tarik 18th Pasienni in, ka MELC pastorpite leh ka Lutheran bulpite deisahna tangin, Bishop Consecration thei in, ka om hi, Pasien in loupina tangta hen’ chiin a gen hi. ‘Gintahloupi in, Delhi a um unau Zo/Zoute’n ka na ngaituo khahlou, tam bang kipahpina nei bawlpieh ziehin, ei siempa leh mipite tungah ka lungdamna lienpi ka’ng gen hi’. ‘Tunia, tam mun a, tam banga nei na welcome u’a, nei kipahpi dingun, zong bangma ka na mathei kha sih hi’ chiin ama’n gen hi. Ama’n a genna ah, “Khentuom paituom neilou in, I Zo/Zoutate khantouna dingin pan ka la ding hi. Apeisa hunte a MELC tungtawn a, I mi I sate a huthei leh a panpitheinate ka mu chieng Pasien ei hepina uh a kilang hi” chiin a gen a, “Pasien thupina tangta hen” chiin mite a maiah a phuongzah hi. Ama’n a genkiana ah, “Koipou, tahsa lam, hlagau lam hita ve’n, panpina ngaite pen bangchi lai hun pou a, a panpithei tan in a panpi ding hi” chiin a gen sawnsawn kia, mipite’n a zah chiengun kipah in khutbeng lailai uhi. Apeisa hunte a, I mi I sate, noptuomna mute, tamlou kuom zong a’ng talang hi. “Mailam hun ah Pasien thu leh late, a lenggam nasepna lam a, damtheina leh septheina ka’ng neitheina ding leh Ama hepina tampi I tantheina dingun, ei thumpieh zing un” chiin a’ng peikhawm mipite kungah a ngen vangut hi.

Pastor GK Samte in thugenna leh guolzawlna thu tampi a genkia hi. Bishoppu toh a na kitheidante a gen a, a minam a na itdante zong a gen hi. Ama’n a genna ah, “I mi I sate, ngainatna leh itna khu pilna thupipen ahi. Mipil a chite, khu a mi a sate it leh khotuote khu ahi. I mi I sate dinga silhoi bawl khu Pasien thu toh kituoh ahi, achi hi. Leitung ah, mi chituomtuom a om a, tuate lah ah, Pasien thugen ding, tahsa lam vaihawm ding leh khosung tuisung vaipodingte, nampi lamkai ding, gam sung vaihawm ding leh adangdang a om toutou hi. Tuachiin, Bishopte leh pastorte pen Pasien thugen ding uh, ahia, leitung vaipote in leitung vai a’ng hawm ding uhhi” chiin a hilchien hi. “Ei pawl lawi-eh leh buonnawi tuonte, tunia Pasien in ei sese Zo/Zou tate Bishop ngathei a, a’ng siemthei pen thupi ka sa hi, Pasien loupina tangta hen” chiin a gen sawn hi. Bishop Mungnou a kipahpi mama thu a genkia hi. Mipite’n ama dingin thumpieh va ui” a chi hi.

Mipite ding sa in, 'Aw mi sang tampi zaila sa hen' chi la limtahin a kisa zou in, Annkuong thumna leh hunkha thumna, Nu Nemnu in a nei hi. Mipi a’ng peikhawmteng in, Bishoppu chibai a buh chiet diemdiem uhhi. Mipite’n ann tuitah a neh zou un, hun tomkhat khawllim in, a inn chiet u’ah, a kileta uhhi.